Skúlar

                             

Í Kunoyar Kommunu eru tveir skúlar, annar í Haraldssundi og hin í Kunoy. Báðir skúlarnir hava skúlagongd fyri næmingum frá 1. flokki til og við 7. flokk.

                              

Kommunan rindar kostnaðin av skúlagongd við aðrar skúlar fyri næmingar í kommununi, ið ganga í framhaldsdeild (frá og við 8. flokk til og við 10. flokk). Harafturat verður goldið fyri næmingar í kommununi, ið ganga í skúlum uttan fyri kommununa frá og við 5. flokki.


Trivnaðarætlan fyri Skúlan í Kunoy

 

Trivnaðarætlan Virðisgrundarlagið byggir á fýra súlur: tryggleika, virðing ,  samstarv og 

 fakligan førleika.

Tryggleiki

av tí at:

·        bæði børn og vaksin virka best í tryggum og jaligum umhvørvi

·        tað er týdningarmikið at tora at ganga nýggjar leiðir, menna síni evni og tora at stíga fram

·        tað er neyðugt til tess at nema sær lærdóm og mennast sosialt

Virðing

av tí at:

·        øll eru ymisk og hava ymiskan tørv

·        tað er neyðugt at læra børn at hava virðing fyri felags virðum og sjónarmiðum

·        øll mugu virða skapanarverkið og tað skapta

Samstarv

av tí at:

·        tað er týdningarmikið at hava álit á og at gera brúk av tí, hvør einstakur eru góður til

·        at samstarv er neyðugt í øllum arbeiði í skúla, í flokki og í øðrum bólkum, vit eru partur av

·        í dag er neyðugt at vísa tolsemi og kunna virka í ymsum høpi, bæði fakliga og socialt eins

væl og í altjóða høpi

Fakligur førleiki

av tí at:

·        dugnalig fólk eru týdningarmikil í dagsins samfelag

·        øll børn hava rætt til og brúk fyri fakligum krøvum, hóskandi til teirra evni og áhuga

·        fakligur førleiki skapar gleði og økir sjálsvirðið

Lærari og álitisfólk skúlans :

·        eru sjónlig vaksin

·        virða øll eins

·        kunna alsamt um skúlans virksemi

·        síggja foreldur sum tilfeingi skúlans

·        fremja gott læruumhvørvi fyri hin einstaka

·        fremja gott og friðarligt umhvørvi til tess at tryggja arbeiðsfrið

·        hava góðar arbeiðsvanar

·        vísa virðing og krevja at verða vird

·        eru góðar fyrimyndir

·        vísa tolsemi

Foreldur og verjar:

·        syrgja fyri at barnið er úthvílt, hevur etið morgunmat og hevur matpakka við í skúla

·        stuðla barninum at gera heimaarbeiðið

·        taka ábygrd av tí, ið barnið ger

·        samstarva við skúlan um reglugerðir, so barnið skilur, at vit draga eina línu

·        virkin samstarva við skúlan

·        eru góðar fyrimyndir

·        vísa barninum, skúlanum og ábyrgdarfólki virðing og krevja at verða vird

·        fylgja við, at barnið trívist og boða beinanvegin frá, um illgruni er um mistrivna

Næmingurin:

·        møtir væl fyrireikaður og stundisliga

·        vísir ymiskleika virðing

·        er opin fyri øðrum og vísir ongum burtur

·        er virkin í flokkinum og skúlanum sum heild

·        er blíðligur og fólkaligur

·        vandar sær um málið   

·        virkin samstarva við skúlan

·        eru góðar fyrimyndir

·        skúlanum og ábyrgdarfólki virðing og krevja at verða vird

 

av tí at : lærarin er einalærari, hevur Skúlastýrið tikið upp samstarv við

 

Førleikastovuna á Skúlatrøð.

Hvat er happing?

·        At happa ella plága er kropsligur ella sálarligur ágangur, vendur móti einum offri, framdur av einstaklingi ella bólki

·        Happing er tá ein, ella fleiri saman, ferð eftir ferð áhaldandi gera seg inn á ein, sum ikki so væl kann forsvara seg. Tað vil siga, at partarnir eru ikki á jøvnum føti

·        Tó kann okkurt, sum rakar einstakan næming eina ferð, bera brá av happing

·        Beinleiðis happing er sjónligt álop á onkran, harðskapur, eitt skump, eitt slag, hóttan, háan,

orð søgd ella send (sms og chat) o.s.fr

·        Óbeinleiðis happing er, tá onkur verður settur uttanfyri vinarbólk ella felagsskap, upplivir

gerðir uttan orð t.v.s. herming og ljótt kropsmál, við vilja ikki verður sæddur, o.s.fr

Hvat eyðkennir ein happara?

·        kropsliga sterkari enn hini

·        góður til spæl og annað

·        trongd til at ráða, kúga, hevja seg við makt og hóttan, vil fáa sín vilja

·        reypar av síni “styrki”

·        er ofta treiskur og frekur, eisini móti vaksnum

·        tosar seg lættliga úr trupulleikum

·        vísír lítla samkenslu

·        heldur nógv um seg sjálvan, er óræddur og vísur í síni søk (lýgur ofta)

·        ofta ein miðalgóður næmingur

·        møtir væl upp

Hvat eyðkennir tann happaða? Tann varni:

·        kropsliga veikari og minni enn hini

·        bangin fyri at fáa prus, ella koma til skaða

·        klossutur í ítrótti og leiki,

·        varin, følin, fer lætt at gráta

·        bangin, ótryggur, ólukkuligur

·        lágt sjálsvirði og lítið sjálvsálit

·        svarar ikki aftur, tá hann er fyri ágangi – er lætt offur

·        bæði fakliga væl fyri og ikki

Tann uppfarandi:

·        illsligur, svarar aftur tá hann verður álopin, men uttan úrslit

·        ófriðarligur, rastleysur, hevur ilt við at hugsavna seg, er vanliga trupul

·        órógvar, eru ofta klossutur og óbúgvin

·        kann hava ótolandi óvanar

·        verður ofta illa dámdur av børnum og vaksnum

·        kann sjálvur happa veikari næmingar

·        bæði fakliga væl fyri og ikki

Hvørji tekin vísir eitt barn, sum er happað ella plágað?

·        kemur heim við klæðum ella bókum, sum eru illa farin

·        kemur heim við merki ella prusi, veit ikki at siga, hvaðan tey stava

·        fer sjáldan ella ongantíð til hús við floksfeløgum ella javnaldrum

·        er sjáldan saman við javnaldrum ella øðrum børnum

·        er sjáldan við til tiltøk saman við øðrum børnum

·        tykist bangin fyri at fara í skúla ella vil ikki í skúla

·        hevur ofta høvuðpínu, ilt í búkinum og/ella ringan matarlyst - einahelst á morgni

·        velur umvegir í og úr skúla

·        hevur marruna og svevur illa

·        tykist ólukkligt og hugtungt

·        skiftandi huglag – skiftir frá øði til ovurgleði

·        stjelur ella meykar um eyka pening

Vit góðtaka ikki happing !

Fyribyrging er besta loysnin !

Til tess at skapa trivnað í skúlanum og fríkorterunum, so er lærarin altið við og luttekur á jøvnum føti í spæli og kappingum í fríkorterunum.

Í stuttum er endamálið  at fáa børn at vera úti og virkin í fríkorterunum, skapa betri trivnað og forða fyri happing

Er lærarin við, so er lættari at eygleiða hvønn einstakan næming.

Tryggleiki og virðing í fríkorterunum skapar trivna og samanhald.

Trivnaður er ein felags uppgáva og tað er møguligt, tá talan er Eina lærarskipan. 

Dagføring av Trivnaðarætlan fyri Kunoyar Skúla 2016.


Trivnaðarætlan fyri Haraldssunds skúla 2016

Fororð
Í okkara nútímans samfelag er neyðugt, at vísa umsorgan og fyrilit. Fyri at menna eitt gott og trygt umhvørvi fyri næmingar, starvsfólk og foreldur, er neyðugt at seta sær klár mál, hvat vit vænta av hvørjum øðrum. Soleiðis skapa vit eitt gott umhvørvi, har sum vit trívast og happing mistrívist! Tá vit í hesi ætlan nýta orðið næmingur, er talan um næmingin bæði í frálæru, fríkorteri og frítímum. Snøgt sagt alla skúlatíðina.

Úr fólkaskúlalógini grein 1: Stk. 3. Fólkaskúlin skal í sátt og samvinnu við foreldrini hjálpa til at geva næmingunum eina kristna og siðalagsliga uppaling. Hann skal við støði í heimligari mentan menna kunnleika næminganna um føroyska mentan og hjálpa teimum at fata aðrar mentanir og samspæl manna við náttúruna. Hann skal búgva næmingarnar til innlivan, samavgerð, samábyrgd, rættindi og skyldur í einum fólkaræðisligum samfelag. Undirvísing og gerandislív skúlans eiga at vera grundað á andsfrælsi, tollyndi, javnvirði og fólkaræði.

Í skúlanum knýta vit vinabond, men vinabond kunnu eins væl verða slitin, um arging, happing, og illstøður eru gerandiskostur ella ikki verða tikin upp og steðga við tað sama. Her á skúlanum verður arbeitt miðvíst fyri góðum trivaði fyri allar partar. Henda ætlan skal verða ein hjálp til tess at tryggja trivnaði í dagliga arbeiðinum og fyribyrgja mistrivnaði. Skal hetta eydnast, er neyðugt, at allar góðar kreftir samvirka. Trivnaður heima hevur eins stóran týdning og trivnaður í skúlanum og samfelagnum sum heild. Saman eru vit sterk!

Tá ið ein trivanðarætlan verður gjørd, er tað av alstórum týdningi, at allir partar kenna seg at eiga lut í henni. Hon skal greitt vísa, hvat væntað verður av næmingum, lærarum, foreldrum og starvsfólki. Skulu vit skapa trivna og forða happing, er neyðugt við greiðum mørkum og felags hugburði.

 

Lærarar og starvsfólk:

·        eru sjónlig vaksin

·        virða øll eins

·        kunna alsamt um skúlans virksemi

·        síggja foreldur sum tilfeingi skúlans

·        fremja gott læruumhvørvi fyri hin einstaka

·        fremja gott og friðarligt umhvørvi, till tess at tryggja arbeiðsfrið

·        hava góðar arbeiðsvanar

·        vísa virðing og krevja at verða vird

·        eru góðar fyrimyndir

·        vísa tolsemi

·        áhaldandi menna sítt fakliga støði

 

Foreldur og verjar:

·        syrgja fyri at barnið er úthvílt og møtir rættstundis. At barnið hevur etið morgunmat, hevur matpakka og øll skúlaamboðini við í skúla

·        stuðla barninum at gera heimaarbeiðið og í hesum sambandi dagliga vitja heimasíðu skúlans

·        taka ábygrd av tí, ið barnið ger

·        samstarva við skúlan um reglugerðir, so barnið skilur, at vit draga eina línu

·        virkin samstarva við skúlan

·        eru góðar fyrimyndir

·        vísa barninum, skúlanum og ábyrgdarfólki virðing, og krevja at verða vird

·        fylgja við, at barnið trívist og boða beinanvegin frá, um illgruni er um mistrivna

 

Næmingurin:

·        møtir væl fyrireikaður og stundisliga

·        vísir ymiskleika virðing

·        Fer væl við skúlans ognum

·        Sigur einum vaksnum frá um hann misstrívist ella sær misstrivna millum skúlafelagar

·        er opin fyri øðrum og vísir ongum burtur

·        er virkin í flokkinum og skúlanum sum heild

·        er blíðligur og fólkaligur

·        vandar sær um málið

fer ikki úr skúlanum áðrenn hann hevur frí ella tá tað er avtalað við lærara

·        Virðir lærarar og floksfelagar

Virðisgrundarlagið
Virðisgrundarlagið byggir á fimm súlur: fakligan førleika, tryggleika, samstarv, virðing og Hugburður/fimi

Fakligur førleiki av tí at: • fakligur førleiki gevur nógvar týðandi møguleikar í dagsins samfelag • øll børn hava rætt til og brúk fyri fakligum krøvum, hóskandi til teirra evni og áhuga • fakligur førleiki skapar gleði og økir sjálsvirðið

Tryggleiki
av tí at: • bæði børn og vaksin virka best í tryggum og jaligum umhvørvi • tað er týdningarmikið at tora at ganga nýggjar leiðir, menna síni evni og tora at stíga fram • tað er neyðugt til tess at nema sær lærdóm og mennast sosialt

Samstarv
av tí at: • tað er týdningarmikið at hava álit á og at gera brúk av tí, hvør einstakur eru góður til • at samstarv er neyðugt í øllum arbeiði í skúla, í flokki og í øðrum bólkum, vit eru partur av • í dag er neyðugt at vísa tolsemi og kunna virka í ymsum høpi, bæði fakliga og socialt eins væl og í altjóða høpi

Virðing
av tí at: • øll eru ymisk og hava ymiskan tørv • tað er neyðugt at læra børn at hava virðing fyri felags virðum og sjónarmiðum • øll mugu virða skapanarverkið og tað skapta

Hugburður/fimi
Hugburður og fimi koma ikki av sær sjálvum. Vit mugu lata næmingarnar uppliva: • viðburð og kenslu av at eydnast • ávirkan • ábyrgd • at fáa rós og at rósa
Til tess er neyðugt at læra: • at handfara rós og rís • at venja evnini til empati

Fyribyrgjandi tiltøk
Fyri at skapa góðan trivna í skúlanum, er neyðugt at fyribyrgja mistrivnaði. Vit mugu hava fastar manngongdir, tá vit renna okkum í trupulleikar sum arging, happing, útihýsan og tá talan er um harðskap. Umráðandi er at hava eyguni við sær. Happing fer oftast fram, tá ongin vaksin ansar tí. Tann happaði torir heldur ikki altíð at siga frá. Tí er neyðugt, at tey vaksnu geva sær fær um tey støð, har ósæddur ber til at happa. Børnini mugu venjast at fylgja við og siga frá, tá tey eru varug við at onkur verður argaður, happaður ella illa viðfarin. Foreldur og starvsfólk skúlans mugu fylgja við og gera sítt til, at happing og annar ágangur verður steðgaður. Onki barn er eins, og kenslurnar koma fram á ymiskan hátt. Foreldrini kenna barnið best, og tí er tað ein avgjørd fortreyt, at samskiftið millum heim og skúla er gott, so at vit saman kunnu virka fyri, at skúlin er eitt gott stað hjá øllum at vera.

Trivnaðartiltøk

• reglur fyri flokkin
• virða og fara væl um tilfar skúlans, bøkur, amboð, tól o.a
• skipa fyri felags upplivingum: máltíð, túrum, evnisdøgum. o.s.fr
• innrætta høli skúlans, so tey verða hugnalig og skapa ró
• styrkja samanhaldið við ymiskum virksemi
• øll hava rætt til at verða sædd
• trivnaðarkanningar millum børn, lærarar og foreldur
• greiðar reglur fyri samskifti
• næmingasamrøður
• kjak um trivna

 Onnur trivnaðartiltøk
• blanda aldursbólkar
• ítøkiliga at rósa ella samtala um góðar eginleikar og góð avrik
• hava næmingar við í avgerðum
• viðurkenning
• lata næmingar stíga fram/framføra

“Virðing fyri øllum”
Átak at steðga tí óhepna – og vánaliga atburði, summir næmingar sýna.
Tað snýr seg serliga um: • at tosa ljótt og niðrandi við aðrar næmingar og/ella starvsfólk • at fara illa við innbúgvi ella skaða bygning • at vera hóttandi • at hava harðliga atferð • at hava aðra niðrandi atferð so sum at útihýsa næmingum og at goyma klæðir • at tilvita órógva frálæruna • at fara úr skúlanum uttan avtala er gjørd um hetta
Um omanfyri nevndur atburður kemur fyri, verður niðan fyri standandi átak sett í verk.

Átak :
Eitt bræv verður skrivað til næmingar og foreldur, sum leiðslan handar flokkunum, samstundis sum hon greiðir frá málinum, orsøk og avleiðing. Hetta átak er í 4 stigum, sum síggjast niðanfyri.

1.
stig: Allir næmingar fáa hetta skriv. Reglur, og tað vit vænta av næmingunum, verður hongt upp á sjónligum stað í flokkinum, og flokslærarin tosar javnan við flokkin um atferð.

2. stig
:Vísir næmingur omanfyri nevnda atburð, verður ringt heim. Hjálpir hetta ikki, verður farið til

3. stig
:Næmingurin verður vístur til leiðslu skúlans, ið tekur støðu til málið. Um barnið verður sent til hús fáa foreldrini um telefon at vita, hví so er. Eru foreldrini ikki at hitta, fær næmingurin forprentað skriv, har tað stutt verður sagt frá, hví næmingurin er sendur heim. Næmingurin fær boð um at verða heima, til fundur hevur verið millum lærarar, foreldur, leiðslu og møguliga onnur.Gongur næmingur í 1. - 2. flokki verða foreldur ella avvarðandi at koma eftir næminginum á skúlanum.

4. stig
:Fundurin verður hildin í skúlanum, og tað, sum hent er, verður nágreiniliga lýst. Foreldur og næmingur mugu klárt siga frá, at ein bati má til, og saman finna partarnir fram til, hvussu sleppast kann undan, at slíkt hendir aftur. Avtalan verður undirskrivað av øllum pørtum.

 

Vit góðtaka ikki happing !

 

Fyribyrging er besta loysnin !

 

Tryggleiki og virðing í skúlanum skapar trivna og samanhald.

 

 

 

Vegna Haraldssnds skúla 2016

KALENDARI

«2017»Í dag«Mai»
1 2 3 4 5 6 7
8 9 10 11 12 13 14
15 16 17 18 19 20 21
22 23 24 25 26 27 28
29 30 31        
M T M H F L S

SAMBAND

Kunoyar kommuna 

Kunoyargøta 7

780 Kunoy

Tel. +298 21 68 14 

kunoy@kunoy.fo


Skrivstovan

Kunoyargøta 7

780 Kunoy

Opið er:

Mikudag frá 8:00 til 9:00


Myndir